Algo me di que che gusta bailar

Tania Veiga profesora de danza malinké africana

Ou, polo menos, a idea de facelo.

Sentes atracción polos ritmos exóticos e apetéceche aprender unha danza que che permita articular todo o teu corpo con liberdade.

Tamén che gusta verte ben, non o podes negar. Pero queres manter o corpo áxil e terso dun modo divertido, pois iso de facer exercicio sen máis, “perna para arriba, perna para abaixo, reeepetimos!” resúltache moi aburrido.

Ademais, interésaste pola túa saúde.

Coñeces a importancia dunha boa alimentación, de manterte en forma e de dedicarte tempo persoal.

Definitivamente sabes que só estando ben ti podes atender a todo o demais. Por iso gústache coidarte, aínda que ás veces, por falta de tempo ou estreses da vida o fas menos do que quixeras.

Eu creo que o que buscas é que cho poñan fácil. Ou viñemos aquí para sufrir?

Queres bailar, pero en confianza, sen presas nin vergoñas, con alguén que che ensine técnicas para mellorar os movementos, que che dea caña e que che permita disfrutar da música e do teu corpo.

Acertei?

Pois aquí me tes.

Tania Veiga Danza Malinké

Chámome Tania Veiga e quero que te divirtas bailando ó son dos tambores

Sei que só precisas un empuxonciño para ter un corpo esplendoroso e cheo de vitalidade, sen sufrimentos innecesarios e divertíndote de verdade, que senón non vale.

Que como o sei?

Todo comezou un pouco de tempo atrás…

Eu estaba facendo a miña tese doutoral, estudaba se as abellas cantábricas preferían polinizar as flores da xanzá de color amarelo ou as laranxas. Tamén saía de festa, bailaba cos amigos e tocaba o djembé e o dundún nun grupo de percusión tropical.

Para manterme en forma ía ó ximnasio, algo que me parecía unha tortura pero que pensaba que fose a única opción.

A miña preocupación era puramente estética, soamente quería mellorar a miña figura, non pensaba na saúde.

A realidade é que foi un período crítico. Cambiei de actividade deportiva moitas veces, pois non me gustaban. Despois sentíame mal, comía máis e peor; entrando así nunha espiral de autocastigo que minaba a miña autoestima.

Supoño que ata aquí é todo normal. Tiña uns vintepoucos anos e me afectaban tal vez demasiado as presións sociais.

Entón, algo sucedeu…

Foi durante unha estancia en Brasil que redescubrín o que me gustaba a danza e que podía ser útil para poñerme en forma. Pouco despois, fun a un taller de danza africana case por casualidade e xa non houbo volta a atrás.

Dende o primeiro contacto dinme conta de que esa forma de bailar tiña que estar moi presente na miña vida.

Aínda que os ritmos viñan dunha cultura lonxana, sentinos cercanos, coma se xa estivesen en min, coma se os entendese.

Había algo máis que aínda non sabía o que era pero que me sentaba moi ben.

Pouco a pouco empecei a formarme nesta nova descuberta, sentía que o meu organismo melloraba nun modo profundo e a miña paixón seguía crecendo.

No momento en que entreguei a miña tese e me fixen doutora xa sabía que o seguinte paso ía ser dedicarme en exclusiva a ser mestra de danza.

Así que usei as estratexias de investigación aprendidas durante a carreira para buscar referentes, afondar na cultura e iniciar unha formación específica de varias disciplinas en España, Portugal, Gambia, Guinea e Senegal.

Dende 2014 adícome en exclusiva á danza africana.

Como mestra axúdoche a disfrutar de toda a vitalidade que hai en ti e como bailarina experimento no meu grupo Perfusión.

Tamén me implico da difusión da cultura e a danza africana a través da Asociación Cultural Galinké.

Pouco a pouco a comunidade segue crecendo. A TVG recolleunos no programa “A Revista” e as máis de 100 alumnas que se formaron comigo deixaron comentarios moi gratificantes.

Algunhas din estas cousas tan bonitas:

“Normalmente chego a danza cargada con mil cousas pendentes na cabeza e coa sensación de que o meu corpo non vai aguantar toda a clase. Pero ó final, saio con máis enerxía, relaxada e satisfeita. É increíble como a música e o baile me dan forza. Saio coa sensación de que podo con todo”

Carmen Márquez

“Gústame a forma de ensinar de Tania, cercana, pero forte e delicada á vez. Uns meses antes de comezar sentíame algo apagada, coa mente nublada. Cando remata a clase teño sempre a mente máis clara, sinto que me recupero a min mesma e estou máis tranquila”

Susana Puertas

Dou fe que bailar regularmente axuda a mellorar a saúde

Non son especialmente delgada, esbelta ou musculosa, non teño unha resistencia atlética, nin unha elasticidade de bailarina de ballet. Son bastante normaliña.

Empecei a práctica regular de danza xa ben madura, con 27 anos e dende entón non me transformei nunha atleta olímpica, pero notei moitas melloras no meu organismo.

O máis evidente é que me podo fiar do meu corpo, os meus músculos están fortes e tonificados, estou áxil e sei activar a miña enerxía cando o necesito.

A nivel mental síntome moito máis a gusto na miña pel. Vexo beleza onde antes vía defectos, vivo moito máis relaxada e confiada.

Como consecuencia vou ó médico con pouca frecuencia e a miña ansiedade reduciuse notablemente.

Para ben ou para mal, o meu corpo non recibiu ningún entrenamento específico para a danza cando era pequena. Pero esta aparente desvantaxe, resúltame moi útil para entender as necesidades das que empezades a bailar xa de grandes.

Todo isto non quere dicir que terás exactamente as mesmas necesidades ca min, ou notarás os cambios exactamente igual ca min.

Se cadra gañas elasticidade con facilidade, pero os teus músculos tonifícanse máis lentamente, ou viceversa, ou o máis difícil resulta ser axilizar a memoria.

Cada organismo é diferente, pero grazas á miña experiencia persoal, e as miñas técnicas probadas coas alumnas, pódoche axudar a poñerte en forma e mellorar a túa saúde integral a través da danza africana. Sexa cal sexa a túa idade, condición física ou experiencia previa.

Chegaremos ata onde queiras chegar.

O único necesario é que teñas ganas de divertirte.

O meu compromiso é que descobras o poder que hai en ti

É unha enorme alegría cando as alumnas empezan a darse conta da forza que hai dentro delas.

En todo este tempo aínda non ocorreu que unha alumna quedase insatisfeita co meu modo de ensinar, pero claro, gracias ás xornadas de portas abertas que organizo tres veces ao ano, é moi fácil entender se as miñas clases te divirten ou non. Notaralo polo sorriso e alegría ao final da sesión.

Queres probar ti tamén o que se sente ao bailar con estructura, pero desmelenándote rigurosamente cando sexa necesario?